Եթե փորձեմ կյանքս բաժանել իրար հաջորդող ժամանակահատվածների, էսպիսի պատկեր կստանամ՝
- ժամանակաշրջան, երբ գրում եմ օրվա/շաբաթվա/ամսվա և ի վերջո տարվա պլանները
- ժամանակաշրջան, երբ ես ապրում եմ գրված պլաններին համապատասխան
- միջանկյալ փոքրիկ ու դեպրեսիվ փուլեր, երբ ես խախտում եմ կայունության մասին գրողի տարած օրենքը (որն, ի դեպ, էլի ես եմ գրել):
Երևի թե մենք յուրաքանչյուրս պիտի ունենանք սեփական արժեքների համակարգը, սեփական նորմերը ու կանոնները, մեկ էլ լիքը սկզբունքներ՝ ուղղակի նրա համար, որ իրենց ամեն օր մի քանի անգամ ոտնատակ անենք:
ասում ա.
- Կարող ես ստուգել իմ սենյակը դատարկ է,
ես չունեմ սկզբունքներ պահելու դարակ (c) Ավելուկ
*****************************************************************
Քանի որ աշխարհում ինձ համար ամենաբարդ բանը ուղղակի որևէ նախադասություն անմիջապես ասելն է՝ առանց տաղտուկ նախաբանների ու ծածկագրերի: Մեկ էլ՝ բութերն եմ չարաշահում:
*****************************************************************
Որոշել եմ շարքեր սկսել: Ժամանակին ունեի 13 նկար ու կպչուն մտքեր շարքը, նա չի գալու, Have you seen this ghost?և այլն: Եթե ուշադիր փորփրեք՝ կզգաք, որ բլոգումս վխտում են լիքը կիսատ, նոր սկսած ու չավարտած կամ էլ խոսք տված, բայց երբեք չսկսած լիքը գաղափարներ ու մտքեր: Դրա համար այլևս ոչինչ չեմ խոստանում, որոշել՝ չի նշանակում խոստանալ անել դա հավերժ կամ գոնե որոշակի հաճախականությամբ:
*****************************************************************
Ֆանտաստիկ առավոտների մասին.
գրելու ամենալավ ժամանակը առավոտն է՝ էլի էի լսել, լիքը նյութեր եմ կարդացել էդ մասին, բայց նաև գիտեմ, որ առավոտյան շուտ արթնանալը սարսափելի դժվար է ու շատ հազվադեպ կարելի է առավոտյան գտնել գոնե մեկ պատճառ կամ մոտիվացիա քնելը չշարունակելու համար: Երեկոյան գրելը լավ է, որովհետև լիքը կուտակված բան կա, գրելու բան կա, լիքը գաղափարներ կան, բայց երեկոյան դժվար է դրանք իրականացնելը, որովհետև մեզ սպառնում է ֆանտաստիկ ու ամենակարող վաղվա միտքը՝ դե լավ, քնեմ, հաջորդ օրը դեռ առջևում է:
Իսկ առավոտյան, թեկուզ՝ մտքերդ կիսատ-պռատ, թարմ ու դատարկ, բայց մեկ է, գրելը հենց առավոտյան է հրաշալի:
Չէ, գրելը ցանկացած դեպքում հրաշալի է: Բայց գրելուն պիտի դեռ հասնել, պիտի հանգել էդ մտքին, որ վերջ, գրում եմ, կամ գոնե սկսում եմ գրելը:
*****************************************************************
Կոկորդիլոս լինելու անհարմարությունը
Մի օր կպատմեմ մարդ լինելու անհարմարության մասին:
*****************************************************************
Եթե ուզում ես ինձ միշտ հիշես
ուրեմն պիտի ուշադիր քշես (c) Ավելուկ
*****************************************************************
ՉՆԱՅԵԼ ԵՐԲԵՔ շարք կամ այլ կերպ՝ հետո չասեք, թե չեմ զգուշացրել
Երբ ֆիլմը նայելու ընթացքում մեխանիկորեն անցնում ես անտագոնիստի կողմը, որովհետև գլխավոր հերոսը սարսափելի ազդում է նյարդերիդ վրա:
Unsane |
Վերջին մի քանի տարիներին նայածս լավագույն սարսափ ֆիլմը՝ սարսափ բառի բոլոր դրսևորումներով ու երանգներով: Շատ որակով ու հզոր ֆիլմ, որն անգամ թշնամուս խորհուրդ չեմ տա դիտել:
Hereditary |
էդպես:
*****************************************************************
Հարցնող- էլի հին ու խավարասեր էությա՞նդ ես վերադարձել
Պատասխանող- երբեք էլ դրանից բացի այլ էություն չեմ ունեցել.
Շարք այն մասին, որ ես երբեք էլ հին ու խավարասեր էությունից այլ մեկը չեմ ունեցել.
Հեղինակը՝ Dolce Paganne
Լուրջ մի ընդունեք ասածներս: Անցանք:
*****************************************************************
Գրելը շարունակելը
պիտի լինի
այսուհետ՝ կյանքի ամենամեծ
շարժիչ ուժը:
Գրելը
կամ գոնե գրելը
սկսելը:
Comments
Post a Comment