Մի քանի օր

Օր առաջին.  

Կապույտ փողկապով պարոն, կասեք` ինչից է, որ գետերը հոսում են

    - թեքության շնորհիվ

    - ո՞ր թեքության

    - քեզ ո՞րն է պետք

    - որն էլ ասեք` կուրախանամ

Օր հինգերորդ.

Պարոն կապույտով փողկապ, մտածել եմ թեքության մասին: ջրվեժն ինչու՞ գետ չէ

    - որովհետև ջրվեժ է

    - բայց թեքություն ունի

    - դու էլ թեքություն ունես

    - դեպի՞..

    - հակառակ ուղղությամբ

    - ե՞ս էլ եմ գետ

    - չէ, ջրվեժ ես

Օր չորրորդ

Պուտիկավոր պայուսակով պարոն, եթե ձեր աչքերը փակեն ու քամի փչեն ձեր ուղղությամբ, կիմանա՞ք որ տեսակի քամին է

    - վախենամ` հա

    - մի վախեցեք

Օր երկրորդ

Պարոն` մեծ գլխարկով, իսկ եթե մեզ պատմեք գոյություն չունեցող կղզու մասին, կհավատա՞նք

    - էն էլ ոնց

    - ինչու՞ չեք պատմում

    - որովհետև ես էլ չգիտեմ դրա մասին

    - իսկ ես գիտեմ: կղզու անունը Մայրի է` հարավային անդերում: լեռան գագաթին: չորս կողմից շրջապատված է օվկիաններով` կարմիր, դեղին, նարնջագույն ու...մյուսի անունը չեմ հիշում: Մայրիում բնակվում են մայրեցիները: պահում են Դեկո կոչվող շնիկներ: դրանք դիմացի ատամներ չունեն: փոխարենը մեծ պոզ է աճում այդ մասում:

    - հա, իսկ օգուտ տալի՞ս են

    - կաթ են տալիս: կաթով ջրում են ծառերը

    - բա մայրեցինե՞րն ինչով են սնվում

    - ծառերի արմատներով

    - իսկ Դեկո՞ն ինչով է սնվում

    - մայրեցիներով

    - վաղնևեթ կավելացնեմ այդ կղզին քարտեզի վրա

Օր երրորդ

Կապտականաչավուն աչքերով Պարոն, ինչու՞ են այդ լեռների անունը Դրակոնյան լեռներ դրել: իսկ Մահվան հովի՞տ: բա Մեռյալ ծո՞վն ինչացու է:

    - ինչի՞ են գայլին անվանում գայլ

    - էդ է բաժին ընկել

    - քեզ Կոլումբոսի տեղն ես դրել

    - գորշ արջը թունավո՞ր է

    - մարդուց շատ չէ

    - իսկ համո՞վ է

    - մարդուց շատ չէ

    - կասկածում եմ

Օր ութերորդ

Արդուկված վերնաշապիկով Պարոն, ես ձեզ կխեղդեմ Էյր լճում

    - բա որ չխեղդվեմ

    - ցած կնետեմ Կոստյուշկոյից

    - բա որ բռնեմ ու չընկնեմ

    - չեք բռնի, բռնվելու տեղ չկա

Օր մինուս մեկ

    - ինչի՞ հենց թերակղզի: կղզի լինելու մեջ թերացել է, հա՞

    - չէ, պարզապես չի ցանկացել կտրվել ցամաքից

    - իսկ եթե վերցնենք ու անջատենք իրարից

    - երկար չեն դիմանա

    - կղզուն երանի

    - հա՞ որ

    - կախված չէ ոչ մեկից: ինքն իր գլուխը

Պայծառ օր

    - զզվում եմ արևից, Պարոն

    - քեզ ի՞նչ է արել

    - խաբել է

    - բան էր խոստացել, չի՞ արել

    - ավելի վատ` ուրիշ բան է արել

    - խեղճ արև

    - արևն, ու ոչ ես, հա՞

Մութ օր

    - սպիտակ չղջիկ կա՞

    - կա

    - սպիտակ բու՞

    - ինքն էլ կա

    - սպիտակ ագռա՞վ

    - կա, ամեն ինչի սպիտակից էլ կա

    - մարդու՞ց էլ

    - բնական սպիտակ` չէ: Ներկած` ինչքան ուզես

Ցուրտ օր

Սպիտակ ու բնական Պարոն, արծաթագույնն արծաթի գու՞յնն է, էդ դեպքում ինչու՞ ոչ ապակեգույն, այլ թափանցիկ

    - բայց դա գույն չէ

    - ձե՞ռ եք առնում

    - առհասարակ ոչինչ չեմ առնում

    - բա՞

    - ձրի են տալիս

Կատաղած օր

Կապույտ Պարոնով փողկապ, եթե մարդը կծի օձին, կկարողանա՞ն փրկել

    - մարդուն հա, օձին` չէ

    - որտե՞ղ է օձերի թույնը

    - ատամներում

    - իսկ մարդու՞նը: ցույց կտա՞ք այդ մասը, որտեղ թույնն է

    - ուզու՞մ ես, ավելի լավ է թույնի մեջ մարդուն ցույց տամ

Լավ օր.

Մեծ Պարոն մարդակերպ, եթե հնարավորություն տային քարաքոս կամ կենգուրու դառնալու, ո՞րը կընտրեիք

    - մածնով բրդուճը

    - իսկ ես պարկը

    - հա՞ որ, տարբերակներիդ մեջ չկար

    - մեր ձեռքը չի՞

Պարոն, երբևէ ընկե՞լ եք թռչունների հետևից: Իսկ իրենք` ձե՞ր:

Ինչու՞ մարդը չունի կտուց ու սիրամարգի պոչ

Ինչու՞ մարդուն կրծողների շարքը չեն դասում, կամ մակաբույծների

Իսկ ոզնու և կակտուսի փշերը հավասար չափո՞վ են ծակում

Բա կաչաղակի ու բադակտուցի կտուցները միևնույն նյութի՞ց են

Երկրի սիրտը չի՞ խառնում այդքան պտտվելուց

Իսկ ձե՞ր սիրտը

Պատասխանեք պարոն:

Կապույտ փողկապով Պարոն

Ինչու՞ արևը չի վառում ինքն իրեն, այլ միայն մեզ

Ո՞վ է իրեն այդքան իրավունքներ տվել

Ո՞նց է դուրս գալիս այդքան էներգիայի ծախսի տակից

Իսկ եթե մի օր չվճարի ու անջատեն լույսը՞

Էլ արև չի՞ լինի

Պարոն:

    - ես պարոն չեմ

Կապույտ փողկապով պարոն

    - փողկապս էլ կապույտ չէ. ու առհասարակ փողկապ չէ: եղջյուր է

Օձերը բարի են, եղջյուրավոր պարոն

    - չգիտեմ, գաղափար չունեմ

    - ես չեմ հարցնում, պարոն

    - բա՞

    - ասում եմ: օձերը բարի են

Դուք ձեզ սիրու՞մ եք, պարոն:

    - ինչքան որ օվկիանոսն է իր ձկներին սիրում

    - իսկ օրվա մեջ քանի՞ անգամ եք կռվում

    - քանի անգամ որ զուգահեռականը հատվում է միջօրեականի հետ:

    Պարոն:

    Փողկապավոր Պարոն:

    Չմոռանաք կղզիս ավելացնել քարտեզի մեջ: