Պատերը փորում են տխրության աչքերը: Տխրությունը քերում է խոնավ պատերին: Աչքերն իրենք իրենց մխիթարվում են:
Ժամացույցի սլաքները կանգնում են թարթիչների կողքին: Թարթիչները մնում են սլաքների հույսին:
Սլաքները պտտեցնում են լարերը: Կտկտոցը դառնում է տարածություն:
Բուրդը թափվում է վերև: Վերևը հարվածում է հատակին: Գորգն ինքն իրեն եռում է: Դառնում է ծավալուն հեղուկ:
Ութի ու հինգի արանքում հայտնվում է բացը: Սկսում են վիճել:
Երեքն ու չորսը բարձրանում են ներքև: Յոթերից մեկը լցվում է վերև: Բոլոր տասերը դառնում են կորիզ:
Թափանցիկ սևը փնտրում է հայելի:
Արձանն ու բարդին բիլիարդ են խաղում:
Վերևում գաթան նեխում է դատարկությունից:
Փետուրը սառչում է սեփական ծանրությունից:
Ապակին հալվում է իր չտեսնելու և ոչինչ չզգալու հատկություններից:
Արձանը հոգնում է իր ներսում եղած կենդանությունից:
Արյունը դառնում է քրտինք: Քրտինքը կորցնում է իր գույնը: Դառնում է սպիտակ: Արյունը վերցնում է սպիտակի հոտն ու դառնում գոլորշի:
Դեղինը քարանում է իր մեջ ամփոփված սևությունից: Սևը վառվում է իր սեփական պայծառությունից:
Գիշերն ու ցերեկը գնդակ են խաղում: Գնդակը դիպչում է ներսի անկյանն ու ծալվում:
Ներսն ու դուրսն իրար են հպվում: Հպումը դառնում է գործողություն:
Կանաչն ինքնիրեն աճում է ներս: Ներսը դուրս է գալիս: Դուրսը մտնում է ներս:
Հեղուկն ու սառույցը գոլորշանում են: Գոլորշին դառնում է փոշի:
Մութը բացվում է: Լույսը հետնամուտքից ողջունում է դռանը: Դուռը փակվում է ընդմիշտ:
Մշտականը վերջանում է: Կարճը մնում է հավերժ: Երկարը լցվում է: Հաստը՝ դատարկվում:
Փոքրն ու մեծը վերևից ձգտում են ներքև: Ձգտումը փոխվում է: Փոխվածը մնում է կայուն: Էությունը դառնում է հասկ: Փայտը վառարանին ներում է: Ներումը դառնում է կասկած: Կասկածից ծնվում է երկաթե ձողը: Ձողը փակվում է իր մեջ:
Փակը դառնում է թափանցիկ:
Բացը սևանում է:
Comments
Post a Comment